Польшяа плануе адкрыць два пункты пропуску на мяжы з Беларуссю 17 лістапада. Ці значыць гэта, што перавозчыкі запусцяць новыя аўтобусныя рэйсы? Журналіст «Люстэрка» пад выглядам звычайнага кліента абтэлефанаваў кампаніі, якія возяць пасажыраў у Польшчу, і спытаў, якія маршруты яны адкрыюць.
Што кажуць рэгулярныя перавозчыкі?
Калі праца двух пунктаў пропуску на мяжы Польшчы і Беларусі адновіцца з 17 лістапада, то перасякаць пункт пропуску «Кузніца» («Брузгі» з беларускага боку) зможа толькі легкавы пасажырскі транспарт. У «Баброўніках» («Бераставіца») плануюць дазволіць перамяшчэнне як легкавікоў, так і аўтобусаў.
Буйныя перавозчыкі, якія ажыццяўляюць рэгулярныя рэйсы, пакуль не плануюць маршруты праз «Бераставіцу». Для гэтага патрэбныя спецыяльныя дазволы, якіх у кампаній пакуль няма.
Так, аўтобусы «Інтэркарса» ў Польшчу пакуль будуць ездзіць старым маршрутам.
— Для таго каб з’явіліся новыя рэйсы, неабходна атрымаць дазволы. На гэты момант у нас усе паездкі плануюцца толькі праз «Тэрэспаль», — патлумачыла супрацоўніца кампаніі.
У «Мінсктрансе» таксама заявілі, што пакуль будуць выкарыстоўваць гэты пункт пропуску. Інфармацыі пра новыя маршруты яшчэ няма.
— У нас ёсць толькі зацверджаныя, мы працуем па іх. Новых таксама пакуль не распрацоўваем, — паведаміла аператарка гарачай лініі дзяржаўнага перавозчыка.
Супрацоўніца Ecolines патлумачыла, што ў кампаніі яшчэ не з’явіліся рэйсы праз «Бераставіцу», але параіла патэлефанаваць з гэтай нагоды на наступным тыдні:
— Удакладняйце ў панядзелак ці аўторак (17−18 лістапада. — Заўв. рэд.). Пакуль новых маршрутаў у нас няма.
Падобная сітуацыя і ў VisitTour: там патлумачылі, што пакуль нават у планах няма выкарыстоўваць «Бераставіцу», цяпер іх аўтобусы перасякаюць мяжу ў пункце пропуску «Брэст».
А што з маршруткамі?
Для паездак за мяжу беларусы часта выкарыстоўваюць і нерэгулярныя рэйсы. Як правіла, іх ажыццяўляюць на мікрааўтобусах. А значыць, яны змогуць выкарыстоўваць абодва пераходы, якія збіраецца адкрыць Польшча. Аднак перавозчыкі, якія арганізуюць шоп-туры ў Беласток (ён за 60 кіламетраў ад «Кузніцы»), пакуль не спяшаюцца мяняць маршруты.
Так, у кампаніі «КактусТур» расказалі, што яшчэ не думалі пра паездкі праз гэтыя пункты пропуску.
— Мы пакуль не ведаем, ці адкрыюць, — адказала супрацоўніца. — Яны ж могуць сёння анансаваць, а працу пачаць праз тыдзень. Нічога ж яшчэ не зразумела. Калі і адкрыюць, то, паверце, там усё роўна будуць чэргі. Як ні круці, не атрымаецца развезці на два пераходы ўсю Беларусь, а яшчэ і літоўскіх, латвійскіх турыстаў. Але калі так раптам здарыцца, то мы з задавальненнем туды паедзем. Не трэба будзе рабіць крук на 800 кіламетраў.
«АртТрансфер» таксама пакуль гэтым пытаннем не займаўся. Кажуць, пакуль дакладнай інфармацыі няма.
— Чакаем адмашкі ад беларусаў. Нашыя аўтобусы ездзяць як заказныя, але мы яшчэ не думалі, як перасоўвацца. Паглядзім, што будзе. Можа, рызыкнём і адправім першы рэйс, — сказала супрацоўніца кампаніі.
Чытайце таксама
